"تخلوا عن الخبراء واسمعواالشعراء فنحن فى ثورة_دعوا العقل وتمسكوا بالحلم نحن فى ثورة_احذروا الحذر واحتضنوا المجهول فنحن فى ثورة" علاءعبدالفتاح
تيجوا نصدق إننا في ثورة بجد؟
وهو احنا مش مصدقين؟ ايوة احنا مش مصدقين
طب نصدق ازاي؟ ايه اللي بيحصل في الثورة؟
سهلة أوي
سيب التلفزيون وانزل الشارع .. اهتف ضد أي حد فاسد سواء كان رئيسك في الشغل أو رئيس الجمهورية
انزل من غير مطالب .. انزل عبر عن غضبك .. متطلبش من حد حاجة يحققوهالك عشان تفض اعتصامك او تظاهرتك .. دة حقك وانت في ثورة! مش عايز يحققها مش هنسكت عليه وهنمشيه بإدينا .. الثورة ثورتنا والشارع لينا
بطل تسمع للسياسيين والمذيعين والتوك شوز .. دول خلاص لعبوا دورهم في السياسة عشان يوصلونا للثورة .. دلوقتي وصلنا للثورة ودي دورنا احنا
متقولش هما عندهم خبرة .. هما عندهم خبرة في السياسة ، لكن معندهمش خبرة في الثورة .. وعمرهم ما جربوها قبل كدة
متخافش وتقول احنا كدة هنضيع اللي عملناه .. احنا معندناش حاجة نندم عليها ، لو كان في حاجة واحدة في مصر كويسة مكانتش الثورة قامت .. ولما شهداء دمهم يسيل ومصابين يفقدوا عيونهم .. اجمل شباب في مصر .. هنخاف على ايه بعد كدة؟
في السياسة بتقبل بأحسن النتائج .. في الثورة مبتسكتش غير وانت محقق هدفك ..
الثورة غضب ، متسمعش لحد يقولك المطلب دة مش وقته والبلد مش مستحمله مظاهرات .. البلد دي هي انت وانا واصحابنا وجيراننا .. يبقى اللي البلد مش مستحملاه فعلا هو الظلم والفساد اللي انتشر فيها .. ولازم ننزل عشان ندفع عجلة إنتاج البلد لما نطهرها من اللي فيها
انت في ثورة .. انت اللي عملتها .. السياسيين دعوا ليها زي ما بيدعو ليها بقالهم سنين وسنين .. لكن وقت ما انت غضبت الثورة قامت ..
اوعى تفتكر انك مكانش ليك دور في ال 18 يوم وان الدور كله كان على وائل غنيم و6 ابريل والناس النضيفة دي .. ﻷ انت اللي عملت الثورة ، هما طول عمرهم بينزلوا ويتظاهروا ، لكن وقت ما انت نزلت معاهم الثورة قامت ومشينا مبارك .. مبارك والنظام كله عمره ما خاف من السياسيين وكان بيسيبهم يتكلموا .. لكن أول ما انت قمت مقدرش يستحمل وهرب ..
انت اللي عملت الثورة .. من حقك تطلب أي حاجة .. ومن حقك تطرد أي حد مش عايز يديك حقك .. دي بلدك وانت تعبت فيها اكتر من اي حد .. انزل اطلب ومتخافش من حاجة ، الدنيا كلها معاك وربنا فوق الدنيا معاك
الثورة كانت حلم السياسيين .. وهما وصلوا لحلمهم .. انت بقى حلمك فين؟ انت نازل تطالب بحقك ، خلي دة حلمك ، متخليش حد يمنعك انك تحلم وتحقق حلمك
من اﻵخر .. السياسة في التلفزيون واﻷوض المقفولة ولعب من تحت التربيزة .. الثورة في الشارع ومواجهة ع المكشوف
احلم وثور وحقق .. ومتخافش
احلم وثور وحقق .. ومتخافش
Islam Mohammed
ليست هناك تعليقات:
إرسال تعليق