الشعب يريد إسقاط النظام

فاكرين الكاريكاتير دة؟؟ دة نزل في ال18 يوم اللي لقينا فيهم مصر في التحرير وبعدين ضاعت مننا تاني .. ومازال البحث مستمر

الشعب يريد إسقاط النظام .. وليس إسقاط الرئيس

ليه قلنا الشعب يريد إسقاط النظام؟ ليه مطلبناش من النظام انه يتخلى عن حسني مبارك؟

سامع واحد فلوطة من بعيد بيقولي ﻷن النظام هو حسني

ﻻ يا حبيبي النظام مش هو حسني

ازاي؟

اقولك .. قبل حسني كان في مين؟ السادات .. هل كان عصره ديمقراطي؟؟ السادات اللي جاتله حالة جنان في سنة من السنين ودخّل كل السياسيين السجون دة كان ديمقراطي؟ السادات اللي كان بيقبض على المتظاهرين اللي بينادوا بالحرب .. دة كان حاكم مؤمن بالحرية؟

طب قبله؟ كان عبد الناصر .. عمل ايه عبد الناصر؟ أول ما اخد الحكم من نجيب بعد الثورة .. المفروض بقى يسلموا الحكم لمدني .. ويرجع الظباط اﻷحرار لمواقعهم في الجيش .. ﻷ اخد هو الحكم وقعد فيه ومسابهوش غير لما مات .. واول ما مسك الحكم دخّل كل اﻹخوان السجن .. طب ليه يبني؟ مش في حرية وديمقراطية والكلام دة وﻻ بنضحك على نفسنا؟ ﻻ بنضحك عليكم ! 

لحظة واحدة .. انت قلت اول ما اخد الحكم من نجيب بعد ايه؟؟ بعد الثورة ..

ثورة؟ يعني ايه ثورة؟

بص يا سيدي .. الثورة دي بتحصل لما بيكون في حكم مستبد وظالم والناس مش ﻻقياله أي حل سلمي .. يقوموا الناس الثوار يطلعوا ع الحاكم دة يرموه في السجن او يطردوه من البلد او انشالله يخرجوه من الحكم وبس .. ويمسكوا هما الحكم عشان يمشوا البلد بنظام مظبوط بقى

ااه زي ثورتنا كدة في 25 يناير .. 

نعم؟؟؟ ثورة ايه؟ 25 يناير كانت ثورة؟ يعني خلاص مفيش ظلم تاني مفيش ذل تاني مفيش قمع تاني مفيش طبقية تاني مفيش ديكتاتورية تاني؟؟؟ وخلاص اللي كانوا بيسرقونا 30 سنة هيتحاكموا وهنرميهم في السجن وناخد حقنا منهم؟ يعني هعرف اقول رأيي والناس تسمعني وأقول رأيي في الحاكم وميرمنيش في السجن؟ صح؟

اومال دة محصلش ليه بقى ؟؟ 

نشوف كدة مع بعض

هدف الثورة :اسقاط النظام

نتائج الثورة :

-تخلى "الرئيس" محمد حسني مبارك عن الحكم و"كلف" المجلس اﻷعلى للقوات المسلحة ب"إدارة" شئون البلاد.

-"تعطيل" دستور 1971 وحل مجلسي الشعب والشورى (فقط)

-إعلان دستوري من المواد اللي "معترضين" عليها في دستور 1971 !!!

-أي حد يقول المجلس العسكري يتحول للنيابة العسكرية

-القبض على العمال والطلبة واي حد يعتصم وصوته يعلى على أسياده اللي مشغلينه

-علاج سيد زيان على حساب الدولة .. ومصابي الثورة (التي انحاز لها الجيش) مش لاقيين اللي يعالجهم

-رشا عزب قالت حقايق على المجلس العسكري في تحقيق صحفي اتحولت لنيابة عسكرية .. لواء جيش متقاعد قال اكاذيب  على الثورة  في التلفزيون .. ودخل نام مرتاح الضمير..

-طلبة إعلام ولاد وبنات اتفض اعتصامهم بالقوة والكهربا .. عمرو البحيري اتحكم عليه ب10 سنين في اعتصام سلمي .. رامي فخري اتقتل .. اتقتل .. اتقتل برصاص الجيش .. وقالولنا رصيدنا لديكم يسمح

-مروة عبد الغفار ..ماتت ضحية اعتصام سلمي

-محمد عفت وكتير غيره .. اتعاملوا من ظباطنا الشرفاء معاملة أسرى الحرب .. واتشتموا بأهلهم ﻷنهم أجرموا وحاولوا يطبقوا مبادئ القومية العربية ورفض الصهيونية اللي ربونا عليها في المدارس ..

-اخويا اتهرس تحت عربية دبلوماسية علشان قال نفسي ابقى انسان .. ومبارك اللي قتله "بيقولوا" انه قاعد في شرم .. عشان نفسيته تعبانة .. 

 نقول كمان .. هدف الثورة إسقاط النظام 

نظام الذل .. لم يسقط بعد

نظام القمع .. لم يسقط بعد

نظام الديكتاتورية .. لم يسقط بعد

نظام الطبقية .. لم يسقط بعد

محمد حسني مبارك .. سقط

طب مين السبب في نظام الذل والقمع والديكتاتورية .. حسني مبارك؟؟ من اللي شايفينه ان حسني سقط والنظام مسقطش .. يبقى مش حسني .. يبقى كان في حد تاني 

مين مين مين مين؟؟ نرجع بالزمن كدة 60 سنة .. ايوة بالظبط ثورة 1952

بداية حكم العسكر .. في السنة اللي قضينا فيها على نظام الإقطاع بدأنا نظام القمع والذل واﻹهانة والديكتاتورية .. لما المؤسسة العسكرية حكمت مصر

المؤسسة العسكرية تقوم على اﻹلتزام .. أو بمعنى أصح ، انك تعامل اللي تحتيك على انهم بهايم .. اعمل كذا .. يا فندم كذا غلط واﻷحسن نعمل كذا كذا .. انت بتعارضني؟؟؟ حبس انفرادي .. على زنزانتك يا كلب

صح؟ مش هي دي المؤسسة العسكرية؟ ومش هو دة اللي حصلّنا طول 60 سنة تحت حكم العسكر؟ سواء في عهد ناصر او السادات او مبارك .. يبقى العيب مش في الرئيس .. العيب في النظام الحاكم .. ايوة نظام العسكر

خايفين من الثورة ضد العسكر؟ كويس يبقى متقولوش اننا عملنا ثورة .. ولو هتقولوا ادي اللي خدناه من الثورة هجيب دماغكم واخبطها في اتخن حيط .. عشان مش دة اللي خدناه من الثورة .. دة اللي خدناه من جبنكم وخوفكم 

بس هنخاف ليه؟ بجد هنخاف ليه

فاكرين التحرير؟ فاكر صاحبك اللي كنتو سهرانين بترغوا مع بعض يوم 31 يناير وبعدين غمضتوا عينكم وقلتوا اكيد بكرة احلى .. صحيت الصبح يوم 1 فبراير استشهد في موقعة الجمل وشيلته على ايديك .. وقالك هتكمل قلتله هنكمل؟
فاكرين هتاف يا شهيد نام وارتاح واحنا نكمل الكفاح .. كان كلام؟ .. كان كلام صح؟ ..

انا مش خايف .. وهخاف من ايه؟ هيحصل ايه يعني اما نقول يسقط حكم العسكر؟ هيضربونا؟ اتضربنا قبل كدة واتقتل مننا كتير اوي .. هيسيبوا علينا البلطجية؟ سيبوهم علينا في التحرير ومخوفناش وﻻ هربنا وواجهناهم واديناهم علقة يفتكروها طول حياتهم .. سيبوهم علينا في مصر كلها قبل كدة وكانت احلى ايام وبرضه اخدوا علقة مكانوش يحلموا بيها 

هيعملوا ايه طيب يعني؟ هيفتحوا علينا النار كلنا ويموتونا .. اوﻻ مش هيستفيدوا حاجة ، هما اذكى من كدة .. القذافي مجنون أوﻻ واستعان بمرتزقة مش بالجيش الليبي ثانيا .. والأسد عيل صغير مش عارف نتيجة اللي بيعمله مش زي لواءات العسكر اللي فاهمين اللعبة كويس


ثانيا هما عارفين ان جيشنا مش مرتزقة القذافي وكتير منه مش هيوافق ابدا يضرب علينا النار وساعتها يبقوا خسروا جامد وانكشفوا قدام الشعب كله..

هيسيبونا نهاتي زي اليمن؟ ساعتها هيلاقوا رجالة بقى ونفسنا اطول منهم ﻷننا عندنا مبدأ ندافع عنه .. لكن هما خايفين وجبناء وعايزين يحموا نفسهم مش أكتر

اخرهم ايه يعني؟ هيهربوا زي بن علي وزي علي صالح .. اما بتقفش حرامي اول حاجة بينكر وبعدين يزعق ويعلي صوته وبعدين يطلع يجري .. والله ﻻزم يطلع يجري في اﻵخر

خوفي مش من العسكر والله .. لكن قلقي من شعب مصر .. هل النظام نجح فعلا يحولّه كله ﻹصلاحيين معندهمش روح الثورة والتغيير ويقبلوا باﻹهانة والذل عشان العيش واﻹستقرار .. رغم ان مفيش وﻻ عيش وﻻ استقرار؟

هعرف ان شاء الله يوم 8 يوليو .. 

إن الله ﻻ يغير ما بقوم حتى يغيرّوا ما بأنفسهم .. واحنا بنغير جوانا روح اﻹنهزام وبنحارب الغرايز اللي غرسها النظام فينا .. وبإذن الله ربنا هيغير حالنا للأحسن .. بس احنا نكمل

سايق عليك النبى ما تقول كفاية يا شيخ

الملحمة لما تخلص يبدا التاريخ

و بكرة جاية حروب فيها لهب و صريخ

و بكرة نصرك يخض الشمس من لهبه

سايق عليك النبى ما تقول كفاية كده

من النهاردة انتصاراتك هتبقى كده

يا شعب مصر اللى رجالته و بناته كده

حلال عليه لبن العصفورة لو طلبه

سايق عليك النبى ما تقول كده كفاية

افرح و كمل و ما تقولش كده كفاية

الثورة دى بداية زى الهجرة و الميلاد

الثورة دى بسملة كمل بأة الاية

مع كل مرة قراية حسنها يزداد

و الايه تجرى تسلم اختها الراية

من غير نهاية و حتى الوقف مش معتاد

و بكرة ايامنا تبقى حكاية و رواية

عن ناس يباتوا حفايا ويصبحوا اسياد

.....

Islam Mohammed