اسئلة مش لاقيلها اي اجابة

في اسئلة كتير اوي في دماغي مش لاقيلها اي اجابة ونفسي بجد حد يجاوبني عليها

كل اللي يقرا البوست دة يفكر في الأسئلة دي كدة شوية ولو لقالها إجابة يقولي عليها

مثلا يعني عندك المجلس العسكري ، قالّك انه حامي الثورة .. طب حاميها من إيه؟ طب طالما انت بتحميها حميتها بعد ما مبارك مشي ومحميتهاش وهو موجود ليه؟ زي يوم الجمل طبعا وانت فاهم وانا فاهم

طب تحميها انت ليه؟ اذا كنا حمينا البلد كلها من البلطجية ودي ثورتنا احنا تحميها انت ليه؟

ونرجع ونقول تاني تحميها من مين؟

طب سيبك .. عندك مثلا مثلا الشهداء دول الله يرحمهم .. ماتوا ليه؟ ماتوا عشان مبارك بدل ما يقعد في القصر الجمهوري يقعد في شرم؟ والله ما يستاهل

طب اومال ماتوا ليه؟ انا متهيألي انهم ماتوا عشان الحرية .. مممم كويس طب فين الحرية؟ 

طب مفيش حرية والشهداء ماتوا .. احنا ساكتين ليه بقى؟ ها؟

يعني انت دلوقتي بتضحك علينا واحنا عارفين انك بتضحك علينا وانت عارف اننا عارفين انك بتضحك علينا .... طب احنا ساكتين ليه انا مش فاهم


طب انا اقولك على حاجة .. احنا دلوقتي قلنا الشعب يريد إسقاط النظام .. سعادتك بتعمل ايه؟ هو النظام دة مش انت ومبارك واللي يتشددلكو ؟؟ ها ؟؟ ولا ايه؟؟

طب احنا مشينا احمد شفيق ليه؟؟ على حسب ما اسمع يعني اننا مشيناه عشان ... ممم ... عشان هو من رجالة مبارك وهو من الوجوه القديمة اللي كرهناها .. . ممم صباح الفل ، انتو عارفين احمد شفيق دة وزير من امتى؟ من سنة 2002 يعني يا دوب بقاله مع الراجل اقل من 9 سنين .. عارفين بقى طنطاوي وزير من امتى؟ من سنة 1991 يا خراااااابي دة من قبل مانا اتولد .. يعني عدى عليه رؤساء وزرا عاطف صدقي ، كمال الجنزوري ، عاطف عبيد ، احمد نظيف ، احمد شفيق .. وهو زي ما هو ..لأ وإيه ..متعين وزير بقرار جمهوري من المخلوع مباشرة ..ايه سفن ايه


طب ساكتين ليه؟؟ يا جدعان حد يفهمني متسيبونيش اكلم نفسي .. يعني راجل طيب زي احمد شفيق (الاهي ربنه يوكسه بحق جاه النبي) نقوم شايلينه ومهزئينه على اون تي في .. والحاج طنطاوي نسيبه قاعد ومربع وعلى قلبنا زي السكر ؟؟ يكونش عمل ضربة جوية دة كمان؟؟

طيب .. احنا قلنا قبل كدة اننا نزلنا يوم 25 يناير عشان الحرية والكرامة وكدة بقى .. وروحنا يوم 11 فبراير عشان مبارك تخلى عن الحكم .. يا صلاة النبي .. معرفتكش انا كدة .. فين الحرية والكرامة والتغيير والعدالة واسقاط النظاااااااااام فيييييييين !!!!! هتجيبولي القلب حرام عليكم

اللهم طولك يا روح .. اهدي يبني هيجيلك القلب .. ننقل ع اللي بعده

عندك يا سيدي بقى مرشحين الرئاسة .. حبايب قلبي دول .. من أنتم؟؟ بجد والله من أنتم؟؟ شوية معــ.. معـــ... معـــارضين للنظام السابق؟؟ تمام اوي فل عليكم .. هو النظام بقى سقط؟؟


متفقين طبعا ان النظام مسقطش .. سعادتكم بقى سيبتم المعارضة ليه؟؟ ولا كرسي الرئاسة شكلوا حلو وقطيفة كدة ويخطف العين؟ هاه؟ هاه؟

بمناسبة المعارضة .. كنا بنعيب على المعارضة الأي كلام ايام مبارك .. طب فين المعارضة دلوقتي؟ سؤال المليون دة .. فين المعارضة؟ ولا احنا عايشين في المدينة الفاضلة ان شاء الله؟

طيييييب ماشي سيبكم سيبكم دة كلام لا يودي ولا يجيب

نيجي لحاجة تانية .. الاستفتاء؟؟ تحبوا نتكلم عن الاستفتاء؟؟

انا مبحبش اتكلم عليه لأنه بيدي شرعية للمجلس .. لكن لازم نعترف اننا غلطنا وقبلنا ان المجلس يحكمنا وهو جزء من النظام ..  ما علينا احنا دلوقتي بنسأل شوية اسئلة مش اكتر

احم احم .. من الطبيعي جدا ان الدستور يتعمله استفتاء عشان الشعب يقول هو موافق عليه ولا لأ؟ تمام؟ تمام

طب الشعب قال مش عايز الدستور بيعملوا استفتاء على ايه؟؟

ما علينا
عملوا الاستفتاء .. وكان في مواد الاستفتاء مادة بتحدد معاد كتابة الدستور الجديد .. قبل الانتخابات ولا بعد الانتخابات

خد هنا بقى .. مش فاهمك ياض .. هو مال الشعب ومال الكلام دة؟؟ هي مش دي قرارات سياسية بحته؟؟؟ طب على كدة بقى لازم نستفتي الشعب قبل ما نحارب في 73 وكان لازم نستفتي الشعب على معاد امتحانات الثانوية العامة وعلى الأكل اللي ينزل في التموين وعلى كل قرار يتاخد في البلد دي ..معاد كتابة الدستور قرار سياسي يا استاذ وكل السياسيين العقلاء قالوا مفيش حاجة اسمها انتخابات من غير دستور .. تقوم بسلامتك جاي تقول ملكش دعوة انت ها يا شعبي يا حبيبي عايز الدستور امتى؟؟ وتيجي تقولي ارادة الشعب و77% والكلام بتاعك دة ؟؟ هو احنا بهايم يا جدع؟؟

اوف .. حسبي الله ونعم الوكيل

عندي بس كام كلمة جد بقى عايز اقولها

---------

طنطاوي والمجلس العسكري بكل من فيه

لو مرحلتوش وحليتوا عننا .. مش هتكون نهايتكم حلوة .. لأ مش هتكون زي مبارك ، انتو عارفين كويس ان مبارك منتهاش لسة وان انتو بتحموه .. وفاكرين ان الثورة كدة خلصت او عايزين تقنعونا بكدة .. انتو ومبارك هيكون مصيركم زي الزفت ومش هتتخيلوه .. بصوا لليمن وعلي صالح .. اليمنيين طيبين ضربوا علي صالح وسابوه عايش عشان يقدر يهرب .. احنا مش طيبين واحنا اتعمل فينا اللي متعملش في الوطن العربي ولا في العالم كله .. احنا مش هنسكت عن حقنا .. احنا ماتلنا شهداء واتعمى كتير واتصاب كتير واتهاننا كتييييير اوي .. مش مصدقينني وبتضحكوا؟؟ اسألوا بتوع الداخلية الألتراس لوحدهم عملوا فيهم ايه .. اسألوا ظباط الاقسام ازاي ولعنا فيهم .. لما بنقول سلمية بنهزر معاكم بس عشان احنا شعب طيب ومبنحبش نضايق حد عشان احنا عارفين ان ضيقنا وحش .. بس انتو شفتوا جزء صغير من غضبنا .. وعارفين بقى يوم 28؟؟ كان الناس لما بتحشدله على النت كانت بتقول يا جماااااااعة سلمية سلمية مفيش عنف .. حتى احمد بسيوني الله يرحمه اللي استشهد في اليوم دة .. كان كاتب نفس الكلام دة .. سلمية سلمية
تخيل بقى لما نقلبها عليكم؟؟ صدقني هتندم وهتندم جامد اوي اوي .. ومع ذلك انا عارف انك مش هتسمع الكلام وكدة كدة نهايتك على ايدينا يا مجلس العواجيز

شعبي حبيبي يا روحي يا بيبي 

عايز اقولك حاجة صغنططة في ودنك .. لو زيي تعبت وقرفت ومبقتش عارف نلاقيها من المجلس ولا المعارضة ولا الاحزاب ولا الاخوان ولا الائتلاف ولا الليبراليين ولا البيضة ولا الفرخة .. لو خلاص هتطق من جنابك وبتدور على اي فرصة عشان تسافر وتسيبلهم البلد يولعوا بيها .. حتى لو قررت تنتحر وآمنت بالله وبصمت بالعشرة ان البلد دي مش بتاعتنا البلد دي ليها اصحاب وكويس اوي انهم سايبينا نعيش فيها .. عايزك تفتكر بس دم الشهدا اللي ماتوا .. مش كلام وبس .. بجد افتكر ان في ناس لا تعرفني ولا تعرفك ماتت عشان انت تعيش عيشة احسن

في منهم اللي مات ومراته حامل وكان نفسه يشوف ابنه او بنته .. في منهم اللي مات واخته على وش جواز وعايز يجهزها .. في منهم اللي يتيم الأب وكان بيصرف على أمه ونزل واستشهد ، عشانك انت مش عشانه هو .. في منهم الولد الصغير والبنوتة اللي زي القمر والشاب الجدع ابو دم خفيف والراجل الكبير العجوز الطيب والأم الحنينة .. في منهم اللي واللي واللي واللي .. كل دول ميعرفوش حد مني انا وانت بس ماتوا عشاني وعشانك 

اوعى تقول مصر مش هتتغير .. عارف لو مكتوب في القرآن او الإنجيل ان مصر هتفضل دولة عالم تالت طول حياتها كنت هقولك ايوة خلاص مش هتتغير .. بس الكلام دة مش مقدرلنا ولا مكتوب علينا .. احنا اللي بنختار مصيرنا واحنا اللي هنغيرها .. مش عشاني ولا عشانك .. عشان خاطر الناس اللي ضحت بحياتها عشاننا

 الأسئلة اللي انا سألتها كلها ملهاش اي اجابة غير اننا في حالة ثورة ومينفعش ندخلها في السياسة الا اما نخلص ثورتنا .. وهنخلصها يعني هنخلصها وهنخلصها على خير وعلى انتصار عالمي بإذن الله

مصر هتتغير .. والله العظيم لتتغير ... وحياة ربنا الثورة دي هتكمل زي ما ربنا بدأها هيتمها على خير

شير ورتويت بقى خليك جدع وحلو كدة :)

اشوف وشكم على خير :)

Islam Mohammed A.K